VESU amuesa la distribución por díes de la so séptima edición y pon les entraes a la venta
Yera un de los anuncios más esperaos: la distribución por díes del so cartelu pa esta séptima edición, que va celebrase del 26 al 28 de xunu y que va volver a convertir Uviéu nel epicentro de la música independiente.
El festival, que cuenta col sofitu de la Fundación Municipal de Cultura del Conceyu d’Uviéu y el conceyu La Ribera, va contar con un cartelu que va volver axuntar delles de les propuestes más destacaes de la escena independiente actual y que va tar protagonizáu por una docena de bandes y artistes a les que se van sumar los DJ encargaos d’animar cada día.
El vienres y el sábadu, los conciertos van celebrase nel Espaciu FMC, que va tar sitiáu en El Campillín, nel recintu de la Fundación Educativa Santo Domingo – Dominicos, Bien d’Interés Cultural y que dende la organización quier ponese en valor.
Pal domingu, la CAB (Central Artística de Güeñu en La Ribera) va ser l’escenariu d’una amplia xornada festiva en formatu sesión vermú, estendiendo la so esperiencia más allá de la ciudá y conectando col entornu rural.
VESU por díes
Vienres 26 de xunu
La xornada de entamu van tar protagonizada por Depresión Sonora, Dora Black -el nuevu proyeutu musical de Pimp Flaco y Kinder Malo-, Mujeres y Sobrezero. Lucía Dilema va acompañar a toles bandes coles sos amestures d’indie, pop y rock.
Sábadu 27 de xunu
Maria Arnal y Puño Dragón encabecen el cartelu del segundu día que tamién tien a Snake Eyes, DenisDenis, Las Petunias y el Conciertu Vibra Mahou de La Sonrisa de Julia, mientres que Mediocre DJ va ser l’encargáu d’amenizar la xornada.
Domingo 28 de xunu
En Gúeñu va celebrase ‘VESU en La Ribera’ cola Billy Boom Band y Begut que van ser les bandes encargaes de poner el broche d’oru a esta séptima edición de VESU, que va zarrase cola sesión DJ de Diskreepo.
Cola so propuesta musical, VESU, que tien un añu más el sofitu de Vibra Mahou, la plataforma de música de Mahou Cinco Estrellas qu’impulsa esperiencies alredor del direutu, vuelve a consolidase como un de los festivales más orixinales del norte de la peninsula, amesturando una programación contemporanea con bandes consolidaes y grupos emerxentes.
