Tanxugueiras celebra dez anos de carreira no Coliseum da Coruña coa presentación do seu novo disco 'O Cuarto'

Sabela Maneiro, Aida Tarrío e Olaia Maneiro abren xira este sábado 17 de outubro na súa única cita en Galicia durante o 2026

Tanxugueiras presentará este sábado 17 de outubro de 2026 no Coliseum da Coruña o seu novo traballo discográfico, titulado "O Cuarto", nun concerto moi especial co que o trío de pandereteiras celebra unha década de traxectoria sobre os escenarios. A cita no recinto coruñés, que xa conta coas últimas entradas á venda, converterase na única oportunidade de ver en directo ao grupo en Galicia ao longo de todo este ano, ademais de marcar o punto de partida oficial da súa nova xira de concertos.

Para esta noite de celebración do folclore e da lingua galega, Sabela Maneiro, Aida Tarrío e Olaia Maneiro contarán coa participación sobre o escenario de convidadas de primeiro nivel como Valeria Castro, María José Llergo e o dúo galego Caamaño & Ameixeiras, xunto a outras sorpresas que se irán desvelando ao longo do espectáculo. A xornada arrincará a partir das 20:00 horas coa actuación de apertura da formación tradicional Lagharteiras, tras a apertura de portas prevista para as 19:00 horas.

O regreso de Tanxugueiras ao espazo indoor de maior capacidade do noroeste peninsular volve situar á música de raíz nun enclave multitudinario. Con "O Cuarto", o grupo consolida a súa evolución sonora sen perder o vínculo coa tradición oral e a creación colectiva, ofrecendo un espectáculo concibido para ser desfrutado e compartido tanto no recinto como a través da cobertura en directo desta publicación.